النادي اللي يفرط في لاعبيه
يستاهل ينزل دوري 'المراحيض'!
عجبت مما يحدث بين الناديين الكبار من خطف النجوم من أندية الأقاليم أو الأندية الغلابة من أجل تفريغ هذه الأندية من النجوم التي تصنعها بشق الأنفس وربما تستدين لتصرف علي هؤلاء النجوم ثم يأتي الناديان الكبايران ويخطفان هؤلاء النجوم..!
الغريب أن هناك أندية تصارع علي الهبوط وتضطر أن تفرط في أحد لاعبيها الكبار وكأن مسألة الهبوط لا تعنيها يا تري فيه؟! وإيه الأسباب وراء تفريط هذه الفرق في نجومها وسط الموسم وهل السبب الحقيقي الفلوس أم الضغوط التي يمارسها بعض أعضاء الأندية الكبيرة والتي تعود أخيرا ا لي الفلوس والمصالح الخاصة!.. والناديين الكبار هما اللي وراء تحريض اللاعبين في الأندية بسياسة الفلوس وطبعا الزن علي الودان أمر من السحر!
والغريب أكثر أن الناديين الكبار لا يبحثون عما ينقصهم في بعض المراكز بل يجمعون كل لاعب يلمع اسمه أو ينضم لأحد المنتخبات الوطنية..!
والأدهي من ذلك هو صراع الناديين الكبار لضرب صفقات كل طرف من أجل حرمان الطرف الآخر من الاستفادة باجهاض الآخر واضعافه.. وكأن مصلحة الرياضة لا تهمهما أو مصلحة الكرة المصرية لا تعنيهما.
لذلك طلبت تكوين جبهة مضادة للناديين الكبار من أندية الأقاليم والمظالم للوقوف صفا واحدا أمام قطبي الكرة المصرية اللي ممكن يغرقوا الكرة المصرية في المستقبل القريب!
وطلبت من أندية الأقاليم أن تحارب ضغوط وفلوس الناديين الكبار من أجل الحفاظ علي لاعبيها للبقاء في الدوري العام دوري الأضواء والشهرة.. وأن تقف بالمرصاد لتفريغ فرقها من لاعبيها وبدل ما يكون فيها نجم واحد.. ايه المانع يكون هناك نجمين أو ثلاثة..!
وعقدت اجتماعا لمندوبي أندية الأقاليم وقلت ماذا يحدث في أنديتكم لماذا تفرطون في نجومكم وسط الموسم؟
قال مندوب أحد الأندية نعمل ايه.. النادي بقي علي الحديدة واللاعب حيجيب قرشين كويسين يفكوا الزنقة..! وأبقي حبيب النادي الكبير والبركة في العمولة.
وقال مندوب آخر احنا بعنا اللاعب لأن أحد الأندية الكبيرة هددنا يا ناخد اللاعب يانشتغل لكم في الأزرق.. وحنقفل حنفية الفلوس عليكم وممكن نضغط علي اتحاد الكرة يوقع عليكم عقوبات!.. فقلت طب اشتغلوا لهم في الأصفر والا الاسود.. اشمعني الأزرق يعني!
وقال مندوب ثالث اضطرينا نبيع اللاعب عشان نفك رهن الحديدة بتاعة النادي.. وكما احنا مش عاوزين نقعد في الدوري الممتاز.. بلا نيلة!
استغربت من كلام المندوب وقلت له كل الأندية بتحارب علي الصعود للممتاز.. وازاي انتوا مش عايزين الممتاز..!
فقال: أيوه.. مصاريفه كثيرة.. والناس بتبصا علينا و'ينقوا' علي الايرادات والفلوس انما لما بنكون في الحرافيش.. ماحدش بياخد باله آمال ايه..! ولاحد بيحس بينا! الهبر والنتش يبقي علي ودنه!
قلت بقي هي العملية كده.. انتوا تستاهلوا تنزلوا بقي دوري المراحيض!
وعقدت اجتماعا مع مندوبي الناديين الكبار.. وقلت ايه اللي بتعملوه في المظاليم ده! حرام عليكم سيبوا لهم اللعيبة اللي شمه نفسها.
وقال أحد المندوبين بي طبعا لازم 'نؤش' علي الجاهز.. لسه حنربي ناشئين ونصرف ونستني وعلي رأي المثل يا مربي في غير ولدك.. يا مش عارف ايه..!
وقال المندوب الآخر شوف أنا مكنتش عايز معظم اللعيبة اللي أنا خدتها.. فقلت آمال خدتها ليه؟
قال أصل النادي المنافس كان بيتفاوض معاهم قلت ألحق أضربه بمبه!.. طب وحتستفيد ايه.
ازاي حاستفيد انني أضعف المنافس وأنا أبقي المنافس وأنا أبقي الفتوة زي ما حصل في صفقة أحمد بلال وصفقة عمرو زكي وأنيس بوجلبان وغيرهم!
طب حتيجبوا أماكن في القايمة منين وأنا سامع ان القايمة حتكون 25 لاعبا بس.. فقالوا في نفس واحد الاتحاد مش هيقدر.. ومتنساش اننا قطبي الكرة بيننا الحرب الباردة.. وطبعا الاتحاد حيعمل قايمة مطاطة بأستك منه فيه..!
خرجت أشد في شعري وقلت الحل عند بتوع الاتحاد اللي ساكنين الجبلاية.. وقلت لهم حتتصرفوا ازاي في المشاكل دي..!
فقال أحد المسئولين أهم حاجة انهم ما بيجبوش سيرة الاتحاد وطالما الموضوع بعيد عننا واحنا بنطور الميزانية يبقي الموضوع ما يخصناش..! إحنا بتوع الفلوس والبزنس.
ذهبت للمدام أحكي لها ما حدث.. فقالت خلاص أنا بعتك في فترة انتقالات يناير وجبت ناشيء من الأقاليم وبسعر مغري جدا.. فقلت حاشتكيكي للجنة شئون اللاعبين قصدي لمحكمة الأسرة!..
قالت ما يهمنيش 'القايمة' في جيبي وعلي بياض!
18
